死得人多

又傳來消息，周聰和雪梨都走了。呢排死咁多人，被抽水抽得最勁的，當然係蔡瀾。

突然之間，社交平台上，多了好多蔡瀾的片段。最好笑，係好多蔡瀾金句。有些搜羅了蔡瀾的廿句名句。咁就真係好利害。摩西上山搵上帝，返落山都只係帶來十誡，蔡瀾大你一個孖。

至於廿句名句，有幾多真幾多假，我就唔敢講。而家AI可以做返成段片，用你個樣用你把聲，做到似模似權。

咁查實又唔駛追究，是否真實，因為，駛乜認真呢？十誡你都唔理，又做乜去理蔡瀾講過乜野呢？

至於香江四大才子，就更加將香港文化沙漠之特性突顯出來。呢四位仁兄，點解咁出名，全因佢地有娛樂性。近代都有好多長篇小說，雜文。。。都冇人睇，但就睇晒金庸作品？因為娛樂性豐富囉。我當年廿幾歲，誤打誤撞睇到劉以鬯的酒徒，驚為天人，大開眼界。知道自己以前幾膚淺。

金庸就比較博學，值得尊敬，其餘三個，就曉得包裝，所以咪受歡迎囉。黃霑都讀得書多，但係樣樣做下，作曲唔夠顧家輝、黎小田；填詞唔夠鄭國江、盧國沾。。。做生意又蝕到仆街。

唔好講啦，費事有人話：你好巴閉咩！？死看更阿伯。

我就寧願低調D，死左之後，去到一個只有我和食神的地方，時時刻刻都開開心心。