早知如此

今日年初五，過去四日，我又開工，又玩樂，非常開心。

因為我係計日薪，雖然今年二月有廿九日，但係有幾日假期，計埋今個月真係唔夠皮，所以我自動獻身，請老細過年有乜野我都照撈。

咁就呢四日假，安排左去赤鱲角開工，人工仲好到不敢相信。我心諗，個場一係有鬼，一係有賊。

年初一晚去到，原來係一個露天場，有個由貨櫃改裝成的辦公室，我的工作就係鎮守呢個位，每個鐘出去巡一次。我行來行去，都見唔到有鬼，就算有鬼，我窮過鬼，鬼都怕左我。唯一要驚就係有賊。賊呢，睇新聞通常係爆左入來，綁住看更阿伯，然後搬貨。我見個場都冇乜貨，都唔慌會有賊。安全計，我一回到貨櫃，就立即反鎖。我每次外出，先觀察形勢先開門，咁就減少風險。

如是者，真係好太平。第一晚除了很凍，真係正到無倫。我訓到早上六點半才醒。一場來到，收工就去睇下個櫻花園，吊佢鹵味，全部謝晒。

第二晚，一切依舊，又係訓到六點半醒。收工就搭車上昂坪衫碌拎。假期車費卅十幾蚊，但係老坑價只係兩蚊，笑到收唔到聲。行過寶蓮寺，心經簡林，就回程。賞心樂事。返到東涌，嘩！人多到呢，好在我早去早回。

第三晚，都冇特別，又係訓到六點半醒。放工就搭車返象山飲茶，煎個蘿蔔榚，好正呢。

昨晚，即係第四晚，最後一晚，交接時，日更阿姐話，第二朝佢地員工會回來上班，佢任務完成，大家江湖再見了。我都懶理咁多，我買左隻糯米雞，今晚做宵夜。一切如常，但係今次，我訓到五點九就醒。醒左就唔磨啦，起身收拾東西，上網睇報紙。冇耐聽到有雜聲，仆街！唔通臨尾先有賊？伸個頭一睇，有兩條友打開大門入來。拿拿聲走出去，早晨早晨，你地咁早就開工呀！

真係有運，如果訓到六點半先醒，被人撞破，就醜死鬼囉，仲唔知會唔會有手尾跟。交接妥當，咁就收工。搭巴士入大埔，去文武二帝廟參拜，再搭巴士行大運，走我最喜愛的林錦公路去元朗，再回荃灣。

返到屋企，心諗，今個新年，真係完美。跟住上床休息，今晚仲要開工。眠得咁上下，電話響，係個場那邊，問我抽鎖匙去左邊。我睡到瘟瘟沌沌，只能講，總之我交返畀你地伙計喎。攪來攪去，總算清清楚楚。

拿拿拿，命生成係咁。我做好我本份，本應可以安安樂樂。但總係有D人，柒懵懵咁，就走來攪我。今年六十歲，就六十年來都有咁既人咁既事。到現在，我都懶得勞氣，吊你都費事。