醒來已經六點幾，拎手機睇下賽果。頂！法國隊一粒都入唔到，輸左我十蚊買入球大。
窗外下著大雨，點好呢？本來打算今日去打鼓嶺雲泉仙館睇下荷花，但係咁既天氣，好掃興。等下睇下點先。結果，等極佢都唔停雨，不停係咁落，連落街食早餐都唔方便。
等到午餐時份，佢都係咁落。算了，煮個麵，淥埋之前打邊爐剩下的餃子，又當一餐啦。
食完，仍然落雨。本來唔出街，最好就係執拾下屋企。但係落雨心情唔好，大條道理唔做。
想起昨日遇到食神老母，佢話去醫院探食神老豆。心諗，我係咪都應該去探下呢？唉！想落都係唔好，萬一我一去到佢就～～～算了算了。
到晚上，仍然唔想出街，摷晒雪櫃入邊所有的所有，煮個米線，食完就算。
跟住又跑馬了。係今季煞科戰。方仔冠軍練馬師已經落左袋，佢出幾匹馬，第三場的一匹唔用莫雷拉，而用黃智弘，會唔會係醒佢搵返筆過暑假呢？而莫雷拉就走去騎尤達大師匹馬，同時亦幫佢騎頭場另一匹。唔～～～ 劇本就係咁勒。莫雷拉頭場幫尤達殺馬，第三場就放水畀黃智弘。。。一於買條二串三溫披過關啦。
頭場開跑，跑左四百米，就知莫雷拉贏得，果然手到擒來。有成十一倍。已經有本有利。嘩！過埋第二關就肥仔咯。
點知第三場又係莫雷拉尤達贏，吊！黃智弘真係流口水，騎到窒下窒下，乜馬都輸啦。
洩左道氣，唔玩啦！轉返投注戶口內的錢走。今季收工。
今晚都係早D訓，睇下起唔起到身睇波啦～～～
沒有留言:
發佈留言