世界盃期間，晚晚有波打，難免投注下。幾十年前阿叔林尚義就話過，呢類大賽，一般都係緊張而不精彩，尤其進入淘汰賽階段，大家都小心翼翼。經過我觀察和分析，很多時候都係上半場零比零。不過你都可以用陰謀論看待，幕後半場食飽，先至打真軍。於是乎我就買半場零比零波膽過關。結果幾次都係過第一關，第二關就唔中。可能有人不講武德，亦有可能係黑手的招數。
但係又有一次，發覺原來我買左阿根廷對佛德角半場和，中到正，有六倍利潤。問題係我完全冇記憶。真係老到朦X查查。
咁贏左波，有本錢，就可以賭馬仔勒。跑到某一場，只得七匹馬上陣。我呢個資深馬迷，明知買Q或位置Q冇肉食，就走去買單T啦。學術D講，七匹馬，亂鳩咁揀三隻買單T，中的或然輪係卅五份之一，唔係太難。加上有心水的話，就一注十蚊博得過勒。果然，一注夾中，派三百卅蚊。又有錢落袋。
總結下來，賭波真係唔化算。尤其是走地盤。你一路睇波，精神狀態亢奮，老豆老母都買落去，結果左一巴右一巴，輸到仆街。
風熱感冒經過服用銀翹和煲羅漢果水調理之後，大有改善。不過人地話感冒係要四七廿八日先可以完全痊癒，所以都要去買銀翹繼續食。
另外令我心思思的結他，我頂唔住誘惑，買了下來，今朝去交收。應該有卅年貨仔，所以難免有污漬。但係冇重傷。我問個傻西賣家，佢話佢係代人放的。
我睇過冇大問題，八舊水係物有所值的，快樂地交接完畢，就返歸去研究。
唉！我唔知個用家係乜人，但係好明顯，佢安裝弦線係出左問題，冇可能保持音準，咁你又點彈呢？現在就要等我的起心肝，拆左弦線，進行大清理，再換新的弦線，就會好好玩勒。
因為我初步試過，呢隻野比我年初四買的結他，好不止一倍，音色好，指板易按，非常之抵呀。
非常忙碌，今晚又要應付賽馬。開工！
沒有留言:
發佈留言