休息（二）

昨晚十點幾就眠，半夜三點左右去過廁所，立即又訓。醒來時，已經六點半。梳洗完，咪咪麼麼到七點幾，才去自助洗衣。呢個動作真係費時，攪完晒都差不多九點。正下著雨，唔理咁多，照去行山。之前咁耐冇行山，趁休息，要本利歸還。

落了成晚雨，天氣清涼，正！一邊行，一邊想，點樣將多餘的結他脫手呢？放上社交平台，用乜野字句來形容呢？呢支算係有牌子，但係只屬入門級別，我個人覺得，並不易彈。網上見人出貨經常形容為適合初學者。。。

咁我又多事幹勒。一般人認為，初學最好買支平平地的結他，到上了手，有點心得，才去揀支較好的結他。如今我覺得，呢個係一個謬誤。可能買支平野來學，係因為免得你三分鐘熱度，幾個月貨仔就掉埋一邊，咁就浪費金錢。但係不爭的事實是，平野冇好，指板難按，音準離譜，彈極都唔似樣，咁又點會有心機學落去呢？

同樣的，有人認為新手買車，應該買架平平地，免得揩花了肉痛。事實上，靚車車身堅固，有乜事，保你命仔安全；而且操控，剎車各方面更佳，出事機會低。

世界上太多謬誤，冇經過細心推敲。好似有人話：辦法總比困難多。我敢講一定錯。第一，唔係有困難，又邊會有人去想辦法？有人去想，未必一定想到。如果想到，佢會唔會想第二個第三個方法？所以，每個困難頂多得一個方案去解決。正確來講、係辦法點都多唔過困難。

又想起，最近網上睇到一些統計，十九幾隻乜乜物物最佳唱片。一睇之下，原來我都有好幾隻。恍然大悟。怪唔得我現在冇興趣聽歌啦！唔係因為我老，跟唔上潮流，而係因為我太有品味，欣賞能力超凡出眾，唔係好野唔聽。現在的劣質音樂再難入我耳。

行到夠喉，就落象山邨食午餐。又係去古早味快餐店。四十蚊，豬扒雙蛋意粉，螢光蕃茄汁，仲有樽裝可樂。都幾好味，呢個價錢，抵啦～　

回到家中，又梳洗一番。休息一會，又要出發去九龍灣辦事。完畢後、特登搭個站港鐵去牛頭角，想離遠望下以前大頭文個舖頭，現在變成什麼模樣。點知從列車望過去，被濃密樹蔭遮住，乜都睇唔到。算啦～～～知道又點呢？

搭港鐵返歸。返到樓下，剛巧食神老母出來。上海婆講廣東話，我永遠聽唔明。只聽到：唔得啦～兩個月啦～我去瑪嘉烈～餵佢食飯～保重身體。

唔好講咁多，買啤酒飲啦！