本來，唔休息都可以上城門行下，釋放負能量，但偏偏呢段日子，一係就滂沱大雨，一係就極端酷熱，咁又點去行山呢？所以，日日都好似捱下捱下咁，好低落，好抑鬱。
好勒，捱埋七月十一日，終於可以休息勒。而且又到過冷河時段，所以會休息一星期。於是乎，一放工，就走去飲個早茶。星期日一早，茶居人多到呢，幾乎冇位。搵到個近廚房的位，一路就望住個廚房出口，一有點心出，就撲上去搶。醫飽個肚，為假期打開序幕。
食飽了，就買PACK啤酒返屋企，一邊隊啤，一邊就刨馬仔。十二日係今季最後一次沙田日馬，過完呢個星期，就會進入暑期餓馬階段了。既然係咁，今日就放手一博，買條三串四，每關鐵三角位置Q啦！長話短說，過左兩關，但係注數太多，都係要輸。我就冇記帳習慣，但係感覺上，我估今季我係唔駛輸既。
賭馬同時，一邊打邊爐。食左好多紅莧菜和涼瓜，感覺良好。食完又睇下電視，VIUTV播一套豬玀記世界，睇下睇下，發覺係以前睇過的。呢邊睇完，轉個台又睇星爺的凌凌漆，唔知係第幾次睇咯。
到大約點半鐘，就走去眠。
醒來已經六點半，竟然冇夜尿喎～～～ 十五十六，好唔好去洗衫呢？放假大過天，放肆係最大享受，理柒佢啦。何必迫自己咁忙碌呢？於是乜鳩都唔理，沖茶飲。
飲得一輪，個肚開始有反應，昨晚食咁多菜蔬，要來料啦。質和量都一流。返來又飲多兩輪茶，咦！欲罷不能喎，又去廁所茂下。又出一批貨。應該都清晒啦。可以出發去城門了。
坐上往川龍的小巴。嘩！個司機以為自己係F１車手，行荃錦公路時，西來西去，我扣好安全帶都唔覺安全，要握緊扶手。懷念以前飛龍哥，佢手車辣得來穩，坐得安心。不過好耐冇見，應該死鳩左了。
搭小巴叫有落，遇到有人同時叫的機會有幾多？真係唔多，今日遇到了，而且疊聲疊到百分之一百，我又叫，後面個八婆又叫，疊到我都聽唔到佢講乜。個司機問：係咪路口呀？我唔答、八婆又唔答。為免司機惱羞成怒，我就勉強答：係呀！結果我就早落左半里路。
我終於回到城門水塘引水道了。滿心感恩。城門，你對我不離不棄，我每次回來，你都歡迎我投入你的懷抱。令我想起食神，每次我上天台，佢都企起身，烚熟狗頭咁對住我笑。
呢段路，我太熟悉了。可能天氣太熱，少了遊人，平時見慣的，只有滅絕師太。呢位尼姑，我相信佢每天都來行山。我就想，你咁樣日日行，會唔會係一種執著呢？理柒佢啦，總之我唔行就唔得。
行得咁上下，個肚又有感覺。好在唔係太緊急。唔通昨晚打邊爐，太多菜蔬？都係唔好行太遠，明天仍然放假，可以再來。如今返歸為上上之策。
返到屋企，一蹲，都好有份量喎。我睇條腸今次都清清楚楚勒。
好了，未來幾日，都有好多事幹。
我想，要執下屋企勒。另外，現在屋企有三支結他，要清走年初四買的一支。我想過問下一班老同學，有冇人想要，或者佢地家人、朋友想要，免費送上。又或者，擺上網上交易平台，賣得一蚊得一蚊。但係咁就有擔心。會唔會賣野遇騙子呢？總之，要和陌生人交易，就係有危險。隻琴從救世軍來，可唔可以送返去救世軍呢？
唉！呢幾日都得閒，慢慢來啦。
沒有留言:
發佈留言