休息 （四）

昨晚早早就訓，醒來去廁所時，一睇，只係十一點。再訓過。再醒，哦！四點，打開電視，上半場完，零比零，中場休息。趁呢個空檔去買啤酒返來嘆住睇波。

下半場開波冇耐，英格蘭就先開紀錄。都入得清脆。咁就好睇勒。阿根廷全軍反撲，英格蘭就十一個人全部留守。真係估佢唔到，阿根廷球員唔夠英格蘭球員高，但係就用高波吊入七、八碼，守門員又唔出得，幾個矮仔球員用頭槌來攻。大話夾好彩，又中柱，又被守門員神救出，否則一早輸仆街。

阿根廷急得來唔亂，美斯一個引開你三個防守球員，交給無人看守的安素費南迪斯，一個遠射，終於追平。去到補時階段，美斯底線傳中，由仲矮過我的馬天尼斯頭槌頂入。咁你都冇得好怨啦。

就此絕殺。賽後，英格蘭的啤令含真真冇品，撩事鬥非。

＝＝＝

＝＝＝

輸唔起，盞出醜世界之前。上場你入兩球就威啫，但係你未到球王水準呢。

你愈失態，人地就贏得愈開心。

睇完波，天都亮，咁開心，一於落街飲早茶。茶居大叔似乎冇睇波，一個二個仲講緊昨晚賽馬結果。我就心情大好，食完牛腸又食山竹牛肉。不過質素就麻麻地。

食完離開，嘩！落雨落到倒水咁。個天空邊有咁多雨落呀？冒雨去買定送，今日要的起心肝，執拾屋企了。