休息（五）

昨日終於，終終於，的起心肝攪清潔了。

由入門口，到屋的盡頭，有。。。二十呎？應該冇。但係就比由蜀國，經子午谷進攻長安更艱辛。呢條戰線，危險過霍耳木滋海峽，每一步都係水雷，隨時有無人機襲擊。

攪攪攪，痛苦過程唔想重複，免得有二度傷害。長話短說，執拾舊物，就會塵土飛揚，塵蟎就會進攻我，成身痕。

諸葛亮六出祁山，終於都攪唔掂，自己都死鳩埋。我沿呢條戰線推進左三分之一，已經頂唔順，拿拿聲去沖涼。明天再算。

黃昏時份，炆個涼瓜黃豆排骨湯，唔知點解、涼瓜配黃豆、就係咁正。

無無聊聊，攪到成兩點先訓。六點醒。起來沖茶飲。一邊將浸好的菜乾處理好，煲個菜乾排骨粥。

見外出冇雨，打算出海皮行下。忽然想起食神細妹，就上天台望下。未上到去，已經聽到喵喵叫。平時佢一見到我就走，但係今日佢欲拒還迎，行一步一回頭咁。上到天台，睇下個貓碗，咦，咁乾淨？貓咪通常食野，一定有餘有剩。如今空空如也，好可能食神老母忙於奔走醫院，冇餵貓呀。

本來食神老豆有個餵貓機，自動放糧，都唔見左。四圍搵貓糧，只見一大袋，上面有貓相片，仲唔係你，伸手入去拿一渣出來、嘿，係貓砂。貓糧呢？冇喎～～～餓死貓點算。晨早流流，有錢都買唔到貓糧啦。記起尚有罐魚柳罐頭，倒走油份，頂住檔先啦。希望唔會食壞貓啦。

唉！貓糧好貴架，有乜野可以人又食貓又食，咁我以後就煮來大家食，同食神細妹相依為命啦。。。

而家只有等，等煲粥煮好，食完就繼續攪清潔啦。