笳子炆雞

昨天晚餐懶煮，斬半隻雞做送。食剩一部分，今晚炆笳子，又攪定一餐。

===

星期日投票日，我懶得理，到第二日先知，電腦系統單左，有個官出來發言，兩度哽咽咁話。男人老狗，失禮死人。

我乍聽到呢單野，直覺開心，因為我已脫離呢個行業，不再有此煩惱。跟住仲列舉理由，咁都衰得，班人都唔係食飯既。

其實做任何工作，最好就似諸葛亮，一生唯謹慎，仲要夙夜憂嘆，慌死有乜閃失。你做收銀，開工發夢找錯錢，就可大可小。做電腦仲大鑊，程式一錯，就每單都錯，加起來可以係天文數字。如果係面對公眾的，就人人指住你鬧。

以前的電腦人員，都係兩大或理工畢業，一來係有專門智識，二來，可以通過咁多關考試的，都有起碼的責任感。

有次同學聚會，有條友講左一番有智慧的話。佢話有邊個喜歡讀書丫，都係一種責任，到出來搵食，再去進修的，就係為了更易搵食，養家糊口，又另一種責任。

你對工作有責任感，自然就謹慎，會有隔夜心，會想到如何去改進，如何堵塞漏洞。咁就唔駛出左事，當眾流馬尿博同情，扮自責喇。