椰汁咖喱雞

生活就係生勾勾，活著。乜事都冇做，都係生活。今日收工，去超市買貨補倉，返到屋企先記得，忘記買麵包做早餐。是但啦！飲啤酒做早餐算數。

唔知點解，下一個鏡頭，就係從睡夢中醒來。乜咁黑既？睇下時間，七點半。係早上定黃昏呢？傻啦！梗係黃昏啦！你返八點，七點半醒，跟住點呢？

食支煙定一定神先。

刹那間千百個念頭閃過。唔好諗啦，著褲，執拾行裝，出發。落到樓下，揮揮手，的士就到，眨眨眼就到工地，七點四十九分，花了五十元車費，今日開工成本高了，利潤少了。向同工交代完，就過對面七仔買個飯。

冇乜選擇，只好買個椰汁咖喱雞。七仔的微波爐係好麻撚煩，咁多年，我都未摸通佢點操作。總之攪到佢發出洪洪聲，等幾十秒，手摸覺得有溫度，就算九數。

當然唔好味啦！為了生活，都要食，否則未到十二點，就會餓暈。

都係果句，心安理得，先會睡得好。