暗戰

最近一心要鑽研如何令身體自我修復，即係訓覺。所以昨日冇去投票，潛心訓覺。都睡得好好，日又訓，夜又訓。訓到半夜三點幾醒，磨左一輪，確定唔想再訓，就爬起身。因為我要去洗衫。呢個鐘數去，唔駛爭崩頭。

去到自助洗衣店，隔住玻璃門，望見入邊有個人，女裝打扮，戴住口罩，睇唔清乜樣，但畀我的感覺，就似電影暗戰中，劉德華扮女人。

而佢一身裝扮，就係所謂cosplay女僕服裝。

只係比呢一套更肉感。心諗，半夜三更，會唔會係撞鬼呀？唔理咁多，開機洗衫。離開時好衰唔衰，多事一瞥，佢露出可遇不可求。唔睇尤自可，一睇就嚇出一身冷汗。一定係塑料製成。我估係吳君如呢套特技道具來。

急急離開，過左馬路回頭一望，呢個物體亦都走出店門。站立在門口，我睇起碼身高一米八五，身型似足劍神張家朗。

救命呀！今晚一定發惡夢啦。

唔得！一定要去清除負能量。雖然狀態麻麻，都馬上走上水塘，走入大城石澗，坐返一頭半個鐘，吸收天地正氣，沖走穢氣。期間想到，咁都未夠，於是轉返落圓玄學院，一仆一碌咁走去拜關帝，請求以陽剛正氣，摧毀陰邪妖魅。一不做二不休，再去拜埋呂祖先師，求以純陽之氣保護我。

我睇做左咁多野，應該夠照喇卦？