回煱雞

食物要多樣化，貪得意買了彩椒，煮乜好呢？上次回煱肉都幾成功，今次唔食豬，改用雞扒，於是買多個椰菜，屋企有洋蔥，炒埋一碟，老抽上色，效果唔錯。

===

最近有幾件鎖事要煩。煩起來真係好煩。

領了樂悠咭，搭車平左，但係就變了有兩張八達通。你話幾煩呢！

選擇只有兩個，一，繼續用兩張咭。但係擔心用錯咭搭車，扣左正價，條氣就會頂住，咁就危害健康啦。二，取消原有的八達通咭。過程好煩。。。

先為新咭申請自動增值，要用鴨屎揀揀揀，再連去銀行網頁去申請。等佢通知批准了，再用鴨屎去啟動。然後要取消舊咭的自動增值，原來係要打電話，按一輪掣，然後又等佢通知，再去地鐵服務站取消。為安全起見，我先將咭內千金散盡，確定佢唔會自動增值，先去退返張咭，取回餘額和按金。好撚煩呀！

最後都係揀取消舊咭，現在尚差回水一步。

===

另一個煩事係手機plan。現有的係5Gplan，幾貴。明年二月到期。使用經驗並無特別之處，只係下載更新時比較快。呢個我可以去公園，體育館，圖書館用政府威輝丫。仲快過5G添。

於是決定轉返4G。有人話，死老坑你可以用老坑plan，平好多。我話你識條柒咩！呢類plan，係冇tethering ，我d平板，檯頭電腦咪上唔到網。

我估計我每月用量要百二激，九成都係睇YouTube 。最緊要係用完限定的數據後，佢放乜野速度過我。1M就好勉強，3M就好足夠了，5M我都唔介意。。。

初步睇，SoSim似乎最抵。尚有兩個月，可以慢慢諗。

===

仲有我部壞鬼手提電腦。某日忽然想起，北上華強，或者維修費平好多喎。

但係我回鄉咭又過期，平日都冇乜時間，北上是否可行都係未知數，攪咁多野，值唔值呢？

唉！最重要的，我都甚少用部機，先會乾死電池。整好左，咪又得個擺字？

===

想得多，係咪一定有最好結果呢？

早兩個月，上淘寶網平平地買件衫。佢叫做衝鋒衣，我印象中即係風褸。點知收到貨一睇，哇！上雪山都得呀！心諗呢世都未必有機會著。

點知早幾日的寒流，就合用非常。

當初不加思索，結果效果出乎意外的好。

===

有乜結論呢？刻意，冇保證一定好。

亂鳩咁來，起碼不用傷腦筋。