金針雲耳雞

昨日一早就買了塊雞扒，打算做一個金針雲耳蒸雞。點知翻箱倒籠，有雲耳，冇金針。明明上次一齊買的，唔通咁快就老到濛九查查？死死地氣又落街買。

半夜四點，正在吞卜瞓覺，突然覺得湧動。半夜要屙屎，真係笑死人了。知道係金針雲耳的威力，事實證明，的確如此。

到臨近放工，又有暗湧。返到屋企，馬上又來一劑。食完早餐，再次蠢蠢欲動，成日跑廁所，真係屙突。就當清理門戶啦。

===

昨晚心血來潮，想起個死八婆，每年呢個時分就會打電話來，目的係作我的強積金。不如先下手為強，封鎖佢。但係找了半天，通信錄內都搵唔到佢的紀錄，只能放棄。一放低手機，手機就響，就係個死八婆。真係整定，半點不由人。耍了一下，算了，起碼一年內都唔會再煩我。

===

今天係熱烈期待著的一天。放工後跳上小巴，一拍咭，兩蚊雞。有老坑呀！大家過來睇，有老坑呀！

退伍登陸，唯一好處就係兩蚊搭車。過了呢條線，將來要搵工就更難了。唯有打呢方面的主意。明天我打算搭車入北潭涌，原價廿四個三，老坑價兩蚊。

我工作地點，其實距離象山邨不遠。但要行一條大斜路。早五年的話，係難我唔到。現在，得撚閒咯！搭車的話，三個站要成十蚊，唔抵。以後唔客氣了，搭兩蚊車去食我心愛的滑滑豬腸粉。