又益大家樂

今朝臨天光落雨，氣溫驟降。天寒地凍，走去食碗豬紅碎牛粥，暖笠笠，想到一班契弟要茂監，冇得食，我就特別食得滋味。

晚餐都懶得煮了，又去大家樂。明知今晚凍，買多包Oreo，補充一下熱量。買完先醒起，又食豬紅，又食Oreo，明天一定屙黑屎。

===

工展會開幕，想起差不多十年前，做過幾星期臨時工。經驗並不愉快。當時有兩日天氣就像今天，佢地一個職員，就捱到入左醫院，之後再冇出現。人手本來已經緊絀，又冇補充，剩下的人，就更慘。

毫不例外，每日都要被客鬧。個客搵唔到著數又鬧你，等得耐又鬧你，最後，個主管仲要屈我，結果不歡而散。

回想起來，記得竊聽風雲三入邊，吳彥祖對古天樂講，我地在監房內都見過，人，幾壞都有。

小有小壞，唔開心搵你出氣，有事就甩鍋到你頭上。大有大壞，以色列直情要巴人滅族。。。

===

在樓梯間掉垃圾的仆街，隔幾日又會發作。

不過劇情曲折，現在我有皇牌在手。

有日我又見有袋垃圾，係一個半透明膠袋。入面有淘寶快遞。我拎起手機，拍下了上面的姓名和電話。

之後，就要睇我有多壞了。