２４號就開始休息，當日收工，就全力休息，因為晚上要去香港公園聽音樂會。兩點鐘醒來，就煮飯食。食完咪咪麼麼，差不多時間要出門時，又想屙屎。咁梗係屙埋先啦，出左街急起上來，會好麻煩。屙得屎來，時間好緊迫。去到目的地時，已經略遲。見到門外排晒長龍，我知道今年都係入唔到場。我估人人都一樣想法，停辦了三年，今年復辦，慌死蝕底，一早就來霸位。照我目測，就算我唔屙屎就來，都入唔到場。要等就無謂啦，行過中環，睇下乜環境好過。
行去蘭桂坊，大約六點，好多差佬在維持秩序，來玩的人就不多，似係內地遊客多。記憶中以往大時大節，成條街衣香繽影，今時今日，囡囡唔多掂喎。都係回家去罷。買埋大量啤酒，今晚飲飽大覺訓，咁就最平安勒。
＝＝＝
２５號一覺醒來，已經九點。心諗，不如搭車入西貢。吃過預早準備的花生眉豆南瓜粥、準備出門。點知又急屎。去西貢巴士每小時一班，屙得屎就會錯過，但係屙屎大過天，一於屙左先。之後走落街，巴士已經走左，只好變陣，搭車入上水。
此時天色放晴，巴士走在高速公路上，好舒服。以前在番邦、最喜歡在天朗氣清之時，驅車兜風。如今有司機為我開車，咁就更爽啦。
入上水做乜好呢？係喎，有檔豬腸粉燒賣，以往常幫襯。一到埗就快步前往。但係行來行去，都唔見間舖頭。印象中的位置，如今係中醫針灸診所。唉！大埔的多利民素食早前執左，而家連呢間都執埋，我的心水食肆買少見少。好！又變陣，去聯和墟食豬手。
呢間野好出名，係出名臭。唔係豬手臭，而係佢冇冷氣，食客吐到一檯豬骨，上面附有口水和牙縫內食物殘渣，點會唔臭丫。估唔到咁臭都要排隊，等候期間，過隔籬投注站買條六合彩，如果我一注獨得頭獎，我２０２４年就退休。
食豬手可以看出一個人的年齡。同檯一對男女，看來兩人加埋，年歲都比我一條老坑少。我食豬手，係圇到骨頭節節分離，再將骨縫間的膠質刮乾刮淨。對男女吮左層皮就原隻吐出，真係唔識貨。
食得都好滿意。然後又上征途。輾轉去到元朗的富貴商場，入左間時裝店，見到賣的恤衫，款式熟口熟面，和我幾十年前，風華正茂時的格調差不多。潮流輪流轉，但係我就已經係花甲老翁。行到臗關節投訴，只好回家去罷。又係飲幾罐啤酒，跟住上床去也。
＝＝＝
２６日，早上五時許就醒。心諗，今日都要去飲下茶、行下山先得。落床睇清楚，已接近六點，頭班川龍小巴趕不上了。咁，不如先去洗衫，明早先上川龍飲茶。
上次洗衫遇上易服癖，有心理陰影。在自助洗衣店外伸頭一看，冇人，放心。洗落衫就去食早餐，嘩，又加左價，要四十元，有計，天都未光，得呢間已經開舖，任宰任割。食完返去收衫和乾衣，趁呢個時候就回家屙屎，然後咪咪麼麼，再去收衫。
最麻煩的事情辦妥，就安心去行山。上城門水塘行引水道，天氣適中，十分舒適。行山令人飢餓，未到十點就想搵野食。行完返到市區，十一點，經過大家樂，大多數人仍在食早餐，見到午餐剛上市，就點了個窮L餐，卅七蚊，加大飯底，仲有杯熱飲。馬馬虎虎填飽個肚就歸家。
寫完呢篇紀錄，就去眠一眠。訓醒如果有心水，就買兩場馬仔，如此輕鬆過聖誕，夫復何求。
沒有留言:
發佈留言