驚心動魄

星期日休息，咁星期一朝早就去行山。貪得意，上川龍行落引水道。已經很久冇行過呢段路，故地重遊，勾起不少回憶。

穿過西洋菜田，走一段山路，落到引水道，見到兩隻甲蟲在地上纏鬥，就拎手機來拍照。

仆街勒，手機呢？

身上每個口袋，和隨身背包都查找幾次，死死地氣，確定係冇。仆街啦！

立即回帶，今朝出門，一定有帶，因為我每次出門口，都會點一次，鎖匙，手錶，電話，銀包。落街就去買煙仔，然後去茶居。食左一個叉燒包，一籠乾蒸牛肉。呢個時候有睇過手機。咁就係之後的事了。

於是立即原路折返，睇下是否跌左。仆街勒，要上斜路，個心又急，腳步自然快，行到我扯晒蝦。途中遇到行山人士，咦？就揀個面口和善的，道出原委，問佢有冇見到有人遺下手機，佢話，咁仆街呀！冇見到喎。我就打蛇隨棍上，問佢可否撥打電話。大叔真係心慈面善，冇所謂，就幫我打電話。

佢開動免提，等。。。哎！有聲。。。如果關左機，就凍過水了。跟住。。。如果冇接聽，又係凍過水。等左一陣，阿里路也，有接聽呀！

道明來意，原來係小巴司機。你去總站搵站長啦！千唔該萬唔該，多謝埋行山人士咁樂於助人。澎澎聲趕返落山，取回手機，真係執返身彩。

之後返到屋企，個心口仍然翳住翳住咁。可能一路走得太急，又或者實在太驚惶了。

要知道，唔見電話，係幾大件事。咪以為有密碼保護就安全，曉的自然曉。人地辛苦破解左，發現錢又冇，不雅照片又冇，白做一場，咁就唔好意思啦！