死性不改

我屋企附近係街市，自然就多老鼠。生意人比較精明，知道等政府滅鼠，不如望中六合彩，所以大多數店舖都有養貓，信隻貓好過信政府。

有時觀察到，呢班貓主都幾有趣。好似有間士多，改個貓名做王寶強，但係一隻貓女，攪到佢有身份危機。

有個豬肉佬出名黐線，有次我聽到佢同隻貓講，你出門口坐丫，外面有好多雀仔呀！

之前都講過，樓下髮廊又緬因貓又唐貓，後來仲多隻英國短毛。可能貓多就成日打交，最後搬晒走，只剩一隻唐貓。

至於肥貓老母，終於都養返隻貓了。肥貓走左都有五年，最近先養返隻小奶貓。肥貓老母玩貓真有一手，隻貓會乖乖坐在飾櫃上，佢就一邊看舖一邊摸貓，完全唔會反抗。

人就係咁，喜歡貓的，一世都喜歡。