反彈

老一輩人，都會認識黎彼得，因為佢為許冠傑填詞。早排佢因病入院，連無線的愛回家都冇得做，傳出佢要靠人接濟。

攪了一輪，現在油管開了個頻道，收看次數過十萬。尹光開演唱會，都有份唱一部份。算係一種反彈。

佢自己講，因為叔父係靚次伯，所以自幼接觸戲曲，都係優良的文字，所以根基好，才會填詞得心應手。

蔡瀾話好多後生仔問佢，自己苦無機會，有乜辦法成功。蔡瀾咬牙切齒地講，你努力過先講啦！

蔡生講過，只要掌握了一門技能，就會有謀生的本事。佢自己就因為拍戲，四圍去，飲飲食食，見識多，就可以寫散文，出書，又可以長期拍旅遊美食節目，和利用自己名氣去帶一些豪華團。另一個類似的例子，就係李純恩。

倪匡的科幻小說我唔欣賞，但係佢又係文字根基深厚的，寫得多寫得快，抵佢發達。

提開尹光，早前一陣熱潮，若非佢不斷求變，唱埋rap，搵鬼記得佢d十四座咩。

睇來睇去，一切有因有果，有冇得反彈，彈唔彈得起，都係睇你有冇努力過。