老到懵X查查

休息日，自然飲到唔清唔楚，瞓到唔清唔楚。醒來時天色昏暗，睇下鐘，接近六點。以為係係黃昏六點，睇下手機，廿一號星期一，仆街勒，要返工添。

定一定神，睇清楚，係早上六點。咁先定D。無錯，我係校左鬧鐘，六點去洗衫。真係懵鳩查查。拿拿聲出發，攪成個幾鐘先完事。就出發上城門水塘。

今日有個目標，就係去西方寺。因為上星期睇報紙，話蘇州寒山寺送左個鐘畀香港，就放此處。

行引水道當然係正到無倫，今日雖然係大暑，又好太陽，但係山上陣陣涼風，心曠神怡呀。

行山行夠，就轉小路落老圍。西方寺我經常去，不過每次都係內急，去借廁所用。可能因為誠哥夫人基金損錢，水源充足，所以連廁所都打理得乾淨過五星級大酒店。

入左大門，穿過天王殿，就見到大鐘。唔～～～

唔。。。

我滿心期待而來，來到又不外如是。

可能我心中係想起首詩。。。又月落又烏啼又霜滿天，意境悽美，但係現在日光日白，熱屎辣辣，完全無味道。

想像永遠係完美，現實未必殘酷，但係總有落差。