宿醉之後

我經常會提到，自己幾時幾時隊啤，覺得有必要陳述一下飲酒的利與弊。各位讀者請自行判斷，飲或唔飲，貴客自理。

首先，喜歡飲酒的人，一定試過飲完適量的酒後，心情愉悅，四肢舒泰的感覺。問題是，適量。有些人係缺少了一種酵素，不能分解酒精的，所以一飲就瞓低。相信呢種人，試過就唔會再飲。

咁點解飲酒會心情好？大把文獻有講，大腦會分泌乜乜物物，自己去查。問題來了，因為心情好，好多人就會追酒飲，不知停。大腦分泌亂晒籠，之後就冇晒貨，所以之後傾向另一極端，情緒極之低落。而且酒精會刺激食道和腸胃，輕則口鞋脷掘，重則作嘔肚瀉。長期仲會胃出血。

有人以為飲完酒會好好瞓，其實相反。醉酒後醒來，係酒醒，唔係瞓醒，頭痛噁心，極為辛苦。

飲得多仲會斷片，最怕你仍然會行會走，走去醉駕，發生意外，就一身蟻。

酒的確能助興，杯酒當歌，人生幾何。酒亦能某程度上消憂，暫時忘記煩惱。但亦因此容易變成依賴，酒精成癮。

飲酒就飲酒，千祈唔好交朋友，十個有九個係唔三唔四的人。交際應酬傾生意就另計。

酒量真係可以練返來，所以要節制。尤其是烈酒。飲得愈來愈多，返唔到轉頭。如果工作勞累，收工飲罐啤酒，係心曠神怡。但如果生活不如意，寄情杯中物，就非常危險。識一個人，佢自己承認，因飲酒而輕度中風，好彩唔死得。

我都有段日子借酒消愁，好在迷途知返，想落都心驚。