工作點滴

上星期五，被肥妹激到嘔血，決定放棄呢個女子。

星期六，阿頭休息。巴基之星話阿頭講落，今日總部又來夜巡。我心諗，點會講到明呢？又諗，早一日同肥妹講到明明白白，佢都甩拖，都係慳返啖氣。由得佢啦。

未到十一點，已經人人進入夢鄉。突然傳來對講機聲，肥妹話有私家車入場。我方才夢醒，見總部巡邏車已經來到停車場口，就立即嗌機，巴基！巴基！收唔收到？嗌左幾次，條友先有反應，呢條友訓覺都好深層，多時都叫唔醒。今次及時醒來，執一身彩。如果總部人員，入到管理處，見到條肥屍大隻友，訓到死豬咁，唔知點算。如果事後向阿頭投訴，一定死全家。所以今次肥妹係一人救全家。

心諗，昨晚先剷過肥妹，今次我應該點做呢？其實我大可乜都唔做，坐定定響度。不過做人應份公道，錯就吊左，做得好，係要讚既。所以交更時，就話佢今次做得好勒。其實呢處工作好輕鬆，你攪掂呢件事，就可以了。

到昨晚星期二，開工時，我又提肥妹，今晚都好大機會，會有夜巡。果然，十一點九，車就到。肥妹堅守崗位，心諗，都仲可以喎。阿頭跟車出去夜巡，我就去同肥妹講，做得好！畀隻大拇指佢。然後再解釋，大約點零鐘，阿頭就會返。從呢個閘口入，經過你面前，咁你當然唔好訓啦。然後就用對講機通水就得勒。佢話：我知勒。反正我會轉日更，明天休息。今日最後。

哇！好少在日常對話，聽到人用反正呢個詞。好啦、拜拜。我返管理處同巴基之星講，兩個相對大笑。唉！幾難先調教出一個可以幫手做少少野的，剛學會，就話要走。我唔知佢轉日更係為乜，會唔會係我剷得太勁？我就唔會內疚，早知佢咁快走，我剷到佢飛天添啦。

結果點呢？阿頭一點卅五分回來，肥妹又冇通報。唔知佢係訓左定玩對抗。都最後一日，無敵是最寂寞，我都無謂去尋事。六點鐘經過，睡到睡公主咁。

＝＝＝

六點四十五分，尤芷韻上班，今次又冇戴口罩。當時正下大雨，佢一避進屋簷下，收起把遮，就指住個天：仆街！係都唔撚停雨喎。

原來佢唔止係臭八婆，仲係爛口臭八婆。