謎一樣的女子

我工作的地方，係一個物流倉，一半員工係南亞大肥佬，本地人多數都中年以上。呢個環境，自然係男性居多，就連經常在此流連的一隻貓咪，都係公的。

靚女唔係冇，有一種靚，叫做靚過嚟，即係曾經靚過，大約廿年前啦。呢類靚女都唔少。

天地之道，往往就係咁，污煙障氣之中，就有一個女子，每朝六點四十五分左右，就從B入口進入，沿斜路而上，到A座搭升降機上樓。

輕盈的步伐，窈窕的身形，真係世間少有。年紀我估頂多三十。之但係，都成一年有多，每次見佢，都係戴口罩，所以佢係乜樣，我都唔知。

即係咁，好似以前樓下的肥貓，咁靚咁可愛，行過梗係望多兩眼。貓就會博懵摸下，人就唔敢勒。作為一個花甲老翁，係想得個知字啫。愈睇唔到，就愈想知。求之不得，就輾轉反側。

聰明無敵的我，都苦無對策呀！