小暑

近日有段視頻，係酒店接待處職員，狂吊客人。從畫面看來，係從二樓拍攝，可見大堂音效非常好，職員又吊得落力，拍攝器材收音功能又好。

酒店回應話已作內部處分。吓，乜唔係即炒咩？仲有價講？

今時今日，咁既服務態度，成因有好多，我認為其中一個，就係陳奕迅。鬧客佢係出晒名，不過大家千祈咪好學唔學，要睇下佢報應來得好快，仲好甘添。好多年前，佢在台上用屁股對住觀眾，不久後，就摔破蛋。去年，有觀眾叫佢講普通話，佢就當場發老脾，今年，就中暑暈倒，傷到見骨。

一單未完，又有中環酒店職員爆粗鬧人。我估呢類事情陸續有來，因為天口㷫呀！

好似今日就係小暑，半個月後就大暑，跟住立秋，處暑。七，八月呢個時份叫三伏天，人人都心火盛，要特別小心。隨時望一下就會被人打到仆街。

咁點樣自保呢？好似我早前就煲山楂羅漢果茶，飲完汗水都冇流得咁澎湃。今日就煲冬瓜袪濕湯，和冬瓜粒湯飯，食完一口氣訓左五個鐘，自然就冇機會同人烚氣啦！