忍氣吞聲

話說工作地點，有一個阿頭，兩個正裝，和我們兩個外援，我就長駐，另一個就盡量派同一個人來。最近兩個月，都係同一個肥妹。

叫佢肥妹，算客氣了。其實係小露寶咁身形。年輕的可能唔知係點，我估佢身高五呎，五十吋腰圍。佢長年帶一把長遮，應該是當拐仗用。

佢有另一個外號叫大軍。睇過王晶電影就知，佢有一隻眼珠係白晒的。有人講，呢類人係見到鬼魂的。

做左兩個月，教左佢開工要打卡，拎更紙，今日仍然冇做。

佢官方休息時間係兩點到四點，我教佢，四點到六點，大可盡情眠，不過六點後，全場開工，就唔好勒。但係佢六點後，訓到流口水。

有幾次我巡到佢面前，佢仍耷低頭玩手機，完全無視我。我拍打窗門，同佢講，你玩手機，都要留意下環境。佢話，我會用耳聽住，有車入我會知道。咁有人打交，醉拳對蛇形刁手，你就唔理呀？

阿頭有時要外出夜巡。我就同佢講，阿頭會點半至兩點左右返來，你見到就用對講機通知大家。早兩日，阿頭外巡返來，佢又冇通水，幾乎全場斷正。事後我問佢見唔見到阿頭返來。佢話好似見到。

有次阿頭半夜火起，懷疑肥妹吞卜，話要去省個肥妹。我話，呢個算係冇咁激心架啦！

肥妹算係瀕於傷殘加智障，商營機構，唔係開善堂，冇責任養你。但係我都怕激嬲佢，吊你老母我唔撈啦！咁就大撚鑊。換第二個來，經驗告訴我，係仲仆街的。

打份工，伙計交到差，冇鑊氣，阿頭就唔會詐型。間中有甩漏，過得到就算。阿頭都係人，間唔中都會闔眼訓。我一見到就倒晒樽水，走入管理處斟水。佢聽到門聲就會醒，我又扮冇見到。咁咪大家有排玩囉！

但係世風日下，太多人認為出糧係應份，返工要做野係過份。講佢兩句就吊你老母都仲得。因此，肥妹呢種本應要吊佢老母的員工，都要討好遷就，掉返轉頭怕佢講吊你老母我唔撈勒。