又忘記了

大家係咪好耐冇聽到我講，去川龍飲早茶呢？我真係年紀老邁，記憶力衰退。

我應該係春天後無耐，就話過唔再去幫襯呢間野。我係在另一個平台講，但係唔記得在此講。

當時係點呢？上去幾次，都冇開門。後來撞到茶友，講開先知，成班點心師傅劈炮唔撈。咁端記就家爺仔乸幾條友自己做返。逢星期一休息。

我最後一次去，都未知個底縕，照舊食個雞紮。點知一睇，件豬肚D肥膏完全冇清除。我吊你啦！

後來知道疫情後生意大好，做到班師傅仆街，大家就要求加薪，但不得要領。所以全部跳船。我聽到後都火起。點心師傅係幾點開工？你位於川龍，班友係聚埋一齊搭的士上來開工。先至可以六點有點心出籠。

班師傅由老店主當家時就開始幫忙，到交畀個仔，阿飛。佢地客家人，阿輝發音係阿飛，如果你聽到有條佬叫阿姣，其實佢係叫阿豪。點知阿飛成日賭波，輸到冇錢出糧。班伙計都忍佢，責數責幾個月先一次過出糧。後來老店主將間店交左畀個新抱打理，咁阿飛就更加不務正業，日上三竿先出來屙屎。

店主夫婦先後去世，　一路由新抱打理。到疫情，都捱住。但係疫情過後生意大爆，師傅們覺得要有回報，提出加薪要求，但係不得要領，所以全部跳船。

我知道底縕後，又見到點心水準如此低劣，就話以後永不錄用。

你要走上絕路，無人可以阻你。