奧運精神

昨晚開幕儀式，我就冇現場睇，但係今朝就睇返如何燃點聖火。咁大壇野，當然要有一些事先準備，有些片段，要一早錄好，再加現場，湊合出個效果。

施丹對睇波的人，一定係法國的代表人物，簡東那，亨利唔係唔好，不過被比下去啦。

一開始就由施丹開始，托住火炬上地鐵，點知停電喎，咁係咪倒米，定係自嘲呢？法國地鐵咁靠唔住？唔緊要啦。換左個神秘人物，一路傳遞聖火。到一切講野儀式做完，神秘人又出來，交返火炬過施丹。估佢唔到，跟住佢交畀拿度，西班牙網球手，贏法國網球賽贏到開巷。跟住一路轉手，前後共有廿四位運動員，都係嚮當當人物，在自己努力的範籌，有付出，有成績，世人共讚的。２０２４呢個數目，法文講法係兩個一千，二十加個四。所以就２４個人經手。

奧運精神，有人講，係天份，加後天努力去訓練，再加你的才智，公平競爭下去較量。當年李麗珊得了滑浪風帆金牌，有人話，車，長州玩風帆，我叻過佢啦，我懶得玩呢D野之嘛，我要做、我贏佢九哩啦。你天份或者高，你做過乜？你得？講條柒呀！

＝＝＝

我現在就對住一班逆奧運精英。

前日爆鑊，阿頭疲於奔命。兩次經過肥妹大軍前面，只見肥妹玩手機，發火鬧佢。肥妹仲做左件蠢事，攪到尷尬不堪。我走落去同肥妹講，你知唔知你做緊乜呀？阿頭第三次經過，見我在，就叫我：你TRAIN下佢勒！我之前黑名單左三個，永不錄用架。我同肥妹講，你聽到啦。

同肥妹講，佢做錯乜。佢總有藉口，或者狡辯，或者扮死狗。因為佢殘障，我不能直接問佢視力問題，免得佢反咬我殘疾歧視。佢自己話佢睇唔清楚，所以用手機來幫忙。我吊佢都費事，我企響你面前，揮晒手，你都睇唔到。只係對住手機搔手弄姿，咁你手機用來做乜？用來瘟仔囉！

仆街！你知唔知，咁樣人地可以BAN晒我地成公司既人，斷左合約，連我都冇得撈架？

講完之後，我話，以後有乜人經過，你都要打招呼。我會問返其他人，你有冇做。到昨晚，我十點經過，佢又冇做。我忍佢。我話，今晚好大機會有總部來夜巡。你留心。

結果，真係十一點就來夜巡。大軍又係靜如深海。巴基之星在中閘見到就嗌機。我走落去睇下乜事。質問佢，肥妹答，有人嗌機我咪唔嗌囉。我火都起！你無得救啦！睇下幾時被踢走啦。

＝＝＝

如果阿頭再問我呢個肥妹工作表現，我就話：佢八點至十一點視像通話去瘟仔，然後訓覺。

＝＝＝

如果有逆奧運大賽，我過去一年，有六個金牌得主。