疑似撞邪

昨晚出一篇忍氣吞聲，明顯我對肥妹已經不滿。我地大家咁高咁大，我冇權管佢。好在冇呢個責任，否則真係嘔血。

昨晚去到一點半，總部的巡邏車又到，肥妹又冇通報。其實肥妹職責，只係見有街外車輛駛入，就通過對講機通報。八點開工，到半夜兩點佢就休息。四點休息完出來，大可繼續眠到六點，然後就等收工。阿頭上次火起，就係話，根本只要你做上半夜少少野，又唔駛巡樓又唔駛簽簿，咁你都甩拖。

呢次甩拖，已經係本星期第二次，星期二巡邏車十一點半來，冇通報，到阿頭一點五十分夜巡回來，又冇通報。忍無可忍，就立即走去剷佢。結果呢，去到當然見到佢伏在檯面眠。拍窗叫醒佢，問佢係咪唔舒服，佢依依哦哦。。。我就話，星期二你已經冇通報巡邏車到，今日你又再係咁！

我話：呢處都冇乜野做，官方休息時間仲有兩小時，係非常優惠。正式休息完，仲有兩個鐘大覺訓，仲想點？叫左你六點之後就唔好訓，你就日日訓。

佢好大反應：我冇訓呀！

我話，我地朝朝六點都要巡樓，六點十五分就經過呢個閘口，人人都見到你訓。佢死死地氣唔出聲。

＝＝＝

之後，我就大鑊了。首先，一股好負面情緒湧上心頭。就係之前抑鬱時的感覺，揮之不去。然後，就肚痾，兩點一次，六點一次，回到家十點又一次。

肥妹大軍，可能真係有邪靈附體，佢一唔老禮，我就仆街。我睇我要打印一幅呂祖像，貼在更亭內，鎮住呢個妖魔。