昌師傅對黃師傅

油管上，有幾個裝修師傅拍視頻講裝修工序呀，設計呀咁。大約半年前，有個屋主，搵左黃師傅裝修，結果不如理想，叫師傅改，又話係咁架，冇得改架。

於是搵昌師傅幫手睇下有冇問題。段片拍得好清楚，個櫃頂和天花之間有六吋空隙，個馬桶頂腳。唔識既都知唔妥。

咁黃師傅見被人唱，條氣唔順，拍片反駁。兩家來來回回，都冇結果，個黃師傅仲口出惡言，人身攻擊。到今晚，兩個人終於出來直播對話。

總結係，巧言令色鮮矣仁。黃師傅講野左穿右插，成日阿媽係女人，阿爸係男人，永遠唔答問題。

至於兩個技術問題，就叫個落手做的師傅答，佢話，櫃頂空隙冇六吋，五吋半啫。馬桶係戶主指定要咁做既。

黃師傅今日先爆料，戶主曾經係佢員工，但被炒魷，講明要玩死佢。大佬，早講丫，搵埋佢出來直播丫嘛。

睇完後覺得，黃師傅奸詐，昌師傅多事。

黃師傅的確係成日抽水，彈其他師傅手工差。難怪阿昌會強出頭。但係明知對方係乜人，一纏上了一定沒完沒了，咁就要諗清楚啦！

各家自掃門前雪，係有道理的。如果真係個戶主玩野，咁就捉蟲了。