嚇撚死我

收工回家休息，上網瀏灠下，無所事事。突然眼尾有動靜。

仆街！唔係日光日白都有老鼠卦？但係好似係龐然大物，仲係褐色。我一動，對方就動。

急急起身，如果有怪物，我當然係跳上張櫈啦。

見佢向門口急退，我就底氣足，追上去查看究竟。原來係食神二妹。

因為我道門留一條罅，好讓空氣流通。隻衰貓八八卦卦，就走左入來。

呢隻野有段故。食神老母當年有朋友借左佢一萬銀，後來朋友家隻貓生左一竇，就話，不如送你一隻當還債啦。係英國短毛貓，市價幾多我就唔知啦。不過後來聽聞，係蝕本貨。食神老豆話，佢年年都會屙唔出尿，要去睇獸醫，每次一萬。咁多年來，真係唔知駛左幾錢。

開頭佢地都覺得一隻名種貓，唔能夠好似食神大妹咁，自由放養，怕被人撻，就嚴守封鎖令。不過可能近年覺得，邊個偷左佢，醫藥費都蝕死，就任佢四圍走。

鬼子佬貓真係衰過人，出左我門口，仲要留響處，和我對望。我伸手示好，希望佢聞下我隻手，點知條友依起棚牙，凶到無倫。

回想起食神，對比起兩個妹，真係倍億義犬情重。