好就要讚

有好多YOUTUBER，我真係唔係好認同。

例如，後生迢迢，四圍去飲飲食食，拍片來扮食家。之前我都吊過兩個妹仔，食你都未識食，講乜食評丫。

又有D成日去旅行，去到好冷門地方，講一大爛餐。哥哥姐姐，你正值當打之年，四圍去玩，難聽D講，係不務正業。

當然仲有一D以為自己有幾分姿色，用對波來做招徠，亂鳩咁拍D無謂野，講埋D只有佢先識笑的笑話。我話既：過多幾年，你對波下垂，又冇其他技能，到時你點維生？

拿拿拿！呢位師傅就唔同，佢仲係做緊廚師，在大陸開左舖頭。用工餘時間拍片分享，仲係分享有用既智識。我肯定網上一定唔係佢第一個教用刀、教磨刀，但係佢個出發點，個動機係可敬。