週末玩樂

星期日朝早，等放工階段。巴基之星話：我今日反戴綠丫。

我話你講乜撚呀？講左一輪，先明白，原來佢去深圳玩。連南亞人都唔留港消費，香港真係玩完。

巴基之星好識享受，去年疫情完結，一通關，佢就放無薪假返鄉下，去左六個星期。今年又去左一個星期。我話香港D錢被你地帶晒走啦。

我心諗，唔得！我都要將玩樂最大化。以前一放假，就日以繼夜咁訓，成個星期日就在床上渡過，只係星期一朝早去行山。唔係啦，今次先返屋企眠一陣，然後就出去威啦。

孤獨老人有乜節目丫，咪又係去飛髮，一點鐘去到牛頭角，剪個髮，同大頭文吹下水，佢個場星期日係街坊福利會，成班閒人坐晒響處，我飛完髮都走人，唔逗留咯。

跟住去邊呢？唔～～～我係一個浪子，去到巴士站，第一架來到的巴士就上，任腳走，隻軀隨遇。點知一去到就有車，一睇，仆街丫，玩咁大？係去粉嶺聯和墟。唉！上啦！

心諗，都好，去群記食豬手麵，加個淨牛丸啦！車程梗係長啦。戴上耳塞，聽下歌仔啦。係一對好舊的，有線的耳機，幾十蚊，當然就冇壞左那一對咁好聲。不過呢D野好奇怪，聽下聽下就會順耳。而家串流音樂真係乜都有，以前為左一首歌，就要去買成隻唱碟，好彩就其他歌都岩聽，唔好彩就倒錢落海。想起Doors 的Light my fire，立即送上。想起Fleetwood Mac的 Rumours大碟，馬上來。忽然想起，早前有人提過Simple Minds　的一隻碟，又搵來聽下。呢隊野其實係屬於我的年代，但係就冇乜聽過。摷出來聽，蝦～又幾合口味喎。點解當年冇聽呢？聽下聽下，就到左粉嶺。三兩步就去到目的地，離遠望，仆街！落左閘。走埋去一睇，八月休息，到廿號先開，我早到左兩日。呢D旺場小店就係咁，唔憂做，放暑假又得，農曆年放一個月都仲得。只好嘆一句無奈。

隔籬就係投注站。我係一個浪子，買六合彩都要次次唔同投注站，走入去買左廿蚊。然後過對面街一間粉麵店食碗麵。叫左個四寶河，似係潮州風格，蔥係加埋炸蒜和冬菜，獨欠唐芹，但係成碗野乜味都冇。試下辣油，仆街！超辣。想起以前在柯士甸小路三角廁所附近的麵檔，次次都去叫墨丸河，老細、伙記到打荷都係潮州人，佢地發音係木演河。真係去親老尖都兜過去食。現在想搵似樣的木演都難囉。

離開聯和墟就去搭火車。火車上心中盤算，跟住點呢？想過大學站落車，去懷緬過去。但係以前的記憶，佔大多數都係烏燈黑火，而家時光尚早，冇乜味道。結果就大埔墟落。走去文武二帝廟參拜一番。甚少見到咁多人，其中好多小朋友，可能係老母帶來拜文昌，希望考試有好成績卦。阿仔你將來搵到錢就𠝹天鵝肉，冇錢就𠝹豬腩肉，尹光都係咁講架。

之後都夠鐘返歸了。老人家唔食得辣，我怕早前D辣油會辣到我瀨屎。好在都冇事，平安回家。

一夜無話，訓到四點半就醒。咁就去自助洗衣，攪到七點先完。咁又上城門啦。微風伴著細雨，行得好舒服，正到無話可說。

今個星期的休息日，超額完成，滿意。