遇上周星星同學

自從肥妹要轉日更之後，幾乎晚晚都唔同人來當更。

昨晚一個，遲遲唔見人，到五分鐘前先至出現。佢見到我，就好熱情咁走近，乜又係你呀？！近到幾乎打車輪咁滯。我急退兩步，你去管理處打卡先啦。

佢問：乜要打卡呀？

然後唔郁。大佬，你遲到仲唔快去報到，係咪要打個邊爐先開工呀？

入到管理處，佢又拎張日更的卡來打，攪到亂鳩晒。佢又話自己之前來做過日更，今日先第一日做夜更。我吊你老母，碌大雙眼望住佢。佢未做過夜更，點會認得我呀？我幫佢拎個對講機，遞畀佢。佢望住我，我架？喂大佬！無厘頭已經勾左啦，唔好玩啦！

正裝叫我帶佢去更亭，沿路佢見我著便服，就話：哇！呢處可以唔著制服，著短褲涼鞋架？大佬，你屎眼見到我著短褲呀？我要帶你埋位，未換制服呀！

我話：你就兩點到四點休息。佢問：休息係咪訓覺呀？我話：係跑圈呀！

到更亭，佢問我做乜一頭汗。我都唔客氣，我被你激到標汗呀！

講好佢的職責，除了一般保安工作，就係有車進場，就用對講機通知同事。但係卅分鐘內，兩架車進場，佢都冇通報。肥妹事件後，我知阿頭燥底，就用對講機問佢。叫左幾次都冇回覆，我要用凶狠語氣，佢先回覆，我問佢見唔見到大貨車進場？佢話：乜乜車牌丫嘛。我問：點解你唔報？佢話：有呀！我話聽唔到喎！咁另一架私家車呢？佢死死地氣話睇唔到。

之後，佢先至嗌機通報。但係不到一小時，阿頭返到。又有幾輛車進場都唔通報。大撚鑊啦～～～

我見巴基之星向閘口進發，我本來睇緊奧運，熄機就跟落去。只見巴基在亭前同周星星同學講耶穌。我落到去，巴基就同我講，阿頭要問佢攞姓名，然後就走左。

我同周星星講，得勒！阿頭要黑名單你。頭先你唔做野，人人都見我帶你落泥，交帶你做野．你唔做，係咪想陷我於不義？我之前嗌機問你點解唔嗌機，已經幫到你盡。你叫兩聲又唔叫，係乜意思？

我話：你唔好累街坊呀！人地可以停左和我地公司合約。或者你唔緊呢份人工，好多人靠佢開飯架。個客一下BAN左，大家攬炒，你就關人撚事，好多人冇飯開架。

佢就全程冇出聲，久唔久就依起棚牙咁望住我。唔依尤自可，佢依起棚牙個樣，十足十我一個舊同學，條友懶到出汁，中學時代踢波永遠企響對方籠門口，等人交波佢就食糊。到出來做事，更加仆街。

希望阿頭真係黑佢老母名單，永遠不再見。