由肥妹說起

呢兩日天熱極熱，我份人，試過無限折墮，所以係絕對唔敢幸災樂禍。只係有點替日班同事辛苦。大家唔係做呢行，唔知箇中艱辛。我地行內人，有時望見一幢大廈，又多層數，面積又大，心中就有數，巡一轉樓要幾長時間呢？你睇下大廈門口指揮交通的，曬一個鐘頭就暈得。西九保安要踩單車巡邏，佢地係有暑熱津貼，但係都請唔到人。你唔好睇銀行保安，或者超市、百貨公司保安全日嘆泠氣，就好舒服。我試過問一個企百貨公司的師兄，辛唔辛苦？佢拿起褲腳，答：吊你老母！你話辛唔辛苦！？原來要著壓力襪。

肥妹在我個盤做左兩個月夜更，就要求公司轉日更。八月一日返日更，做左兩日，就消失無蹤，我唔知原因。肥妹係小露寶身型，之前返夜更，佢會著一件羊毛背心。返日更的第一日，依然有著，但係第二日，已經冇著。佢返第一日日更，日更個同事，即係詐病去接機睇演唱會那一個，佢話，我要噴止汗劑，先可以蓋住肥妹陣汗味。

肥妹第一日來呢個場返夜更，中更個阿頭就話：唉！我地公司大慈大悲，接收埋呢個啦。此話怎說？我都無謂講咁多。開頭肥妹都好地地，無瞌眼訓。但係日子一久就現形。我阿頭都好大容忍度，但都有一日忍唔住，話要去省佢老母。

但係之後冇改善，仲變本加厲。我講過，我可以企佢面前，雙手揮舞，佢只顧望住手機視像對話。咁落去，容乜易你玩祼聊架？叫佢唔好鴕鳥咁玩手機，唔好六點後訓覺，佢仲好激動咁反駁，我冇呀！提左佢今晚巡邏車好大機會來，佢都仲係唔理。屢勸不改。大佬，只係要你坐呢個冷氣間做上半夜、然後就有四小時休息，再起身等放工，咁你都不情願，覺得委屈，要轉日更。我都費事多講。結果最後一日，佢都係甩拖，六點後照訓。連好頭好尾都懶，我仲可以點？

全件事我點睇？其實肥妹根本係冇能力做呢份工。係屎忽撞棍，有咁既公司請佢，有咁既客可以容忍佢。但係佢唔明白，唔知自己全身缺憾，搵到工，係十八代祖先用盡全力去保佢，先至有份工可以自食其力。佢唔知珍惜，覺得出住糧去玩視像對話才是本份，咁又有乜人可以幫佢呢？

你一隻眼白晒，又同我講睇唔清楚有車定冇車，但係日更佢又可以抄到車牌喎。你身形咁樣，上一級樓梯都成問題，邊有人會請個巡唔到樓既保安？我講多半句就會被人話我殘疾歧視。

其實唔止肥妹一個，以前遇過不少都係咁，本身根本乜能力都冇、呃呃騙騙搵到份工，甚至有人呃呃騙騙上左高位，只求打殘有能力的人去保住自己可以尸位素餐。唔駛多講，更有太監陳呢個擦擦擦去狐假虎威的，你的結果怎樣，係你自招的。