成就

昨日講到，壞左一邊耳機。上網查過，話極有可能係耳屎堵塞了金屬接觸點，清理一下就得。結果都係唔得。

其實仲有另一樣爛左，就係副老花鏡。唔小心跌落地，個骹位斷左。個接駁點極細，黐唔到。

上網搵到一個方法，就係先灑上梳打粉，再加上超能膠。心諗，應該行得通。但係要想辦法固定住眼鏡框。

想過去買泥膠來固定佢。但係其餘的泥膠點呢？幾十歲人，仲玩泥膠咩。

又被我想到。用麵粉咪得囉！

咁一不做二不休，索性發個麵種，做埋麵包啦！

搓了一小團，發兩日，再撩中間一撮出來加麵粉再搓，又發兩日。都幾靚。今日就又搓一團，留一小塊來整眼鏡，其他的，又混和少量麵種再發，明天就可以正式做包包。

用麵團固定好鏡框，就灑上麵粉，滴上超能膠，待乾，重覆三次，攪定。試戴上，略有點不舒服，不過戴耐一點就會自動調整到。

又慳幾舊水。