扯來扯去

搭小巴經常遇到一些唔知好嬲定好笑的事。

好似最近天雨，小巴一到站，站頭的人就一湧而上，理柒你車上乘客要落車。最近就目睹，一個大姑掙扎下車，但手袋吊帶被上車男子的遮柄勾住。男子站在小巴梯級上，大姑站在地面，好似詠春黐手咁，扯來扯去。。。

另一次有兩母女上車，個女得六，七歲。老母拍完八達通，就叫個女拍。個女逕自埋位坐。老母就一手拉住阿女掛在頸上的八達通的繩，阿女一味往座位衝，阿媽拉住要拍卡，又係扯來扯去。。。

又一次，又係兩母女，個女都五，六歲，但都要抱上車，可能有特殊需要的。阿媽一上車就不停講電話，嗡嗡嗡。。。乜乜物物有落，但係冇提高聲音，繼續嗡嗡嗡。司機應該是聽唔到。嗡嗡嗡，乜乜有落，嗡嗡嗡。此時個女發作，哇哇哇亂叫亂叫。車已到站，但司機無意停車。有一個好事之徒，唔係我，代叫有落。老母抱個女落車，嗡嗡嗡，個女哇哇哇。。。到落左車，個女靜晒，回復正常。

最不幸一次，我被牽扯到其中。站頭只有我和一個大媽。車到，打開門。大媽呢個時候先來問我，架車經唔經王虎呀？我問，王小虎？

王虎呀！

殯儀館來呀？

王虎呀！

桑拿浴室？

此時小巴佬閂閘走人。

大媽話唔好意思。

我話吊你老母啦。

然後又再王虎王虎咁拉拉扯扯。

最後都係我估中係酒樓。呢區有兩間喎，佢都仲係王虎王虎，要我估埋邊間店。最後我話，你去死啦！